Blogger Widgets

വൃക്കരോഗങ്ങളും 35 ജീനുകളും


 
മാഞ്ചെസ്റ്റര്‍ യൂണിവേഴ്സിറ്റിയിലെ ഒരു കൂട്ടം ഗവേഷകര്‍ പുറത്തുവിട്ട പഠനറിപ്പോര്‍ട്ടനുസരിച്ച് ദീര്‍ഘകാലം നിലനില്‍ക്കുന്ന പല വൃക്കരോഗങ്ങള്‍ക്കും 35 ഓളം ജീനുകള്‍ കാരണമാകുന്നു എന്ന് വ്യക്തമായിരിക്കുന്നു. ഇത് കൃത്യമായി കണ്ടെത്താതിരിക്കുന്നത് ഡയാലിസിസ്, വൃക്കമാറ്റിവയ്ക്കല്‍ പോലുള്ള ചിലവേറിയ ചികിത്സാമാര്‍ഗ്ഗങ്ങള്‍ സ്വീകരിക്കുന്നതിലേയ്ക്ക് വഴിതെളിക്കും. ഇത്തരം പഠനങ്ങള്‍ ഒരുപക്ഷേ വൃക്കരോഗങ്ങളെ ഫലപ്രദമായി ചികിത്സിക്കുന്നതിനുള്ള മാര്‍ഗ്ഗങ്ങള്‍ കണ്ടെത്തുന്നതിലേയ്ക്ക് നയിക്കുമെന്നും കരുതപ്പെടുന്നു. 
mucin-1 എന്ന ജീന്‍ ഉത്പാദിപ്പിക്കുന്ന മ്യൂസിന്‍ എന്ന പ്രോട്ടീന്‍ നെഫ്രോണുകളെ പൊതിയുന്നു.  ഈ ജീനുകള്‍ക്ക് സംഭവിക്കുന്ന വൈകല്യം ജീനുകള്‍ സ്ഥിതിചെയ്യുന്ന കുടുംബങ്ങളില്‍ പലതരത്തിലുള്ള വൃക്കസംബന്ധമായ ജനിതകരോഗങ്ങള്‍ക്കും കാരണമാകുന്നുണ്ട്.
ഇത്തരം ജീനുകളെ നേരത്തേതന്നെ തിരിച്ചറിയുന്നത് രോഗചികിത്സയില്‍ നിര്‍ണായക പരിവര്‍ത്തനങ്ങള്‍ക്ക് കാരണമാകുമെന്ന് ഗവേഷണഫലങ്ങള്‍ തെളിയിക്കുന്നു.

കണ്ണിലറിയാം പ്രിയോണുകളെ...



മാരകമായ മസ്തിഷ്ക രോഗമാണ് ക്യ്രൂസ്ഫെല്‍റ്റ്- ജേക്കബ് ഡിസീസ്. (Creutzfeldt-Jakob disease (CJD)). ഈ രോഗത്തിന് കാരണം പ്രിയോണുകള്‍ (Prions) എന്നറിയപ്പെടുന്ന പ്രോട്ടീനുകളാണ്. രോഗബാധിതരുടെ കണ്ണുകളില്‍ രോഗബാധയുണ്ടാക്കുന്ന ഇത്തരം മാംസ്യഘടകങ്ങള്‍ കണ്ടെത്തിയിരിക്കുന്നതായി ജേണ‍ല്‍ എംബയോ പ്രസിദ്ധപ്പെടുത്തിയ ലേഖനത്തില്‍ പറയുന്നു. ലിങ്ക് ഇവിടെ.
ലോകത്ത് ഒരു ദശലക്ഷം പേരില്‍ ഒരാളെ മാത്രം ബാധിക്കുന്ന രോഗമാണ് ക്യ്രൂസ്ഫെല്‍റ്റ്-ജേക്കബ് ഡിസീസ് എന്നാണ് അമേരിക്കയിലെ നാഷണല്‍ ഇന്‍സ്റ്റിറ്റ്യൂട്ട് ഓഫ് ഹെല്‍ത്ത് പറയുന്നത്. ഈ രോഗത്തിന് ജനിതകപരമായോ പാരിസ്ഥിതികപരമായോ ഉള്ള കാരണങ്ങള്‍ ഇതുവരെ കണ്ടെത്തിയിട്ടില്ല. 
പഠനം
സി.ജെ.ഡി മൂലം മരണപ്പെട്ട 11 പേരുടെ കണ്ണുകള്‍ പഠനത്തിനായി ലഭിച്ചതില്‍നിന്നും 11 പേരിലും കണ്ണുികളില്‍ പ്രിയോണുകളെ കണ്ടെത്താന്‍ കഴിഞ്ഞു. കണ്ണിലെ കോര്‍ണിയ, ലെന്‍സ്, അക്വസ്- വിട്രിയസ് ദ്രവങ്ങള്‍, റെറ്റിന, ദൃഢപടലം, രക്തപടലം, നേത്രപേശികള്‍ എന്നിവിടങ്ങളിലെല്ലാം പ്രിയോണുകളെ നിരീക്ഷിക്കാനായി. 
രോഗിയുടെ മരണത്തിനുശേഷം മസ്തിഷ്കത്തിലെ കോശങ്ങളെ പരിശോധിച്ചുമാത്രമേ രോഗം സ്ഥിരീകരിക്കാന്‍ ഇതുവരെ കഴിയുമായിരുന്നുള്ളൂ. മസ്തിഷ്കത്തിന്റെ ഇലക്ട്രിക്കല്‍ ആക്റ്റിവിറ്റി, മസ്തിഷ്കത്തിന്റെ സ്കാനിംഗ്, സെരിബ്രോസ്പൈനല്‍ ദ്രവത്തിലെ പ്രിയോണുകളുടെ സാന്നിധ്യം എന്നിവ പരിശോധിച്ചാല്‍ ഈ രോഗം വരാനിടയുണ്ടോ എന്ന് തിരിച്ചറിയാനാകും. എന്നാല്‍ മറ്റുപല രോഗാവസ്ഥകളിലും ഇത്തരം പരിശോധനകള്‍ക്ക് സമാന ഫലങ്ങള്‍ ഉണ്ടാകാനിടയുണ്ട് എന്നതിനാല്‍ കണ്ണിലെ പ്രിയോണുകളുടെ സാന്നിധ്യം ഈ രോഗത്തെ മുന്‍കൂട്ടി മനസ്സിലാക്കാന്‍ ശാസ്ത്രലോകത്തെ പര്യാപ്തമാക്കുമെന്ന് പ്രതീക്ഷിക്കാം.
കൂടുതല്‍ വിവരങ്ങള്‍ക്ക് ഈ സൈറ്റ് സന്ദര്‍ശിക്കുക.